Gran Tierra Energy (Azerbaijan) filialı qeydiyyata alındı

İqtisadiyyat Nazirliyi yanında Dövlət Vergi Xidməti “Gran Tierra Energy (Azerbaijan) GmbH” şirkətinin yerli filialını dövlət qeydiyyatına alıb.
Filial Bakı şəhərinin Səbail rayonu, Üzeyir Hacıbəyov küçəsi, 69E ünvanında yerləşir, onun qanuni təmsilçisi Kolumbiya vətəndaşı Villalobos Herrera Hector Enrique-dir.

Bu ilin fevralın 18-də SOCAR ilə Kanadanın “Gran Tierra Energy Inc.” şirkəti Quba–Xəzəryanı regionunun qurudakı perspektivli sahəsi üzrə Kəşfiyyat, İşlənmə və Hasilatın Pay Bölgüsü Sazişini imzalayıb.
Sənədə iki şirkətin prezidentləri Rövşən Nəcəf və Gary Guidry imza atıblar.

Layihənin operatoru olan “Gran Tierra Energy Inc.” 65 faiz iştirak payına malik olacaq. Kəşfiyyat işlərinə qravimetrik məlumatların toplanması, 3D seysmik tədqiqatlar və kəşfiyyat quyularının qazılması daxildir.

İyunun 10-da Nazirlər Kabineti hökumətin təminat və öhdəliklərini təsdiqləyib, sentyabrın 30-da isə Milli Məclis sənədi ratifikasiya edib.
SOCAR-ın maraqlarını “SOCAR Quba-Xəzəryanı” MMC təmsil edəcək.
Bu şirkət ötən ilin oktyabrın 3-də 1 000 manat nizamnamə kapitalı ilə yaradılıb, qanuni təmsilçisi Elnur Dövlət oğlu Ağatağıyevdir.