Çikaqoda AI əsaslı Alpha Chicago özəl məktəbi açıldı

Çikaqonun mərkəzində "Alpha Chicago" adlı özəl məktəb fəaliyyətə başlayıb. Burada ənənəvi müəllimlər yoxdur; əsas fənləri uşaqlara süni intellekt proqramları öyrədir. Məktəb sentyabrın 8-də dərs ilinə başlayıb və İllinoys ştatında bu şəbəkənin ilk təhsil müəssisəsidir. Müəssisə hazırlıq qrupundan səkkizinci sinfə qədər olan uşaqları qəbul edir. Gündə təxminən iki saat riyaziyyat, oxu, təbiət elmləri və digər əsas fənlər fərdiləşdirilmiş kompüter proqramları vasitəsilə keçirilir; sistem hər uşağın səviyyəsinə uyğunlaşır. Qalan vaxtda şagirdlər maliyyə savadlılığı, ictimai çıxış, sahibkarlıq, texnologiya və komanda işi kimi praktik bacarıqlara yiyələnirlər. Müəllim əvəzinə mentorlar uşaqlara dəstək verir və onların motivasiyasını qoruyurlar. Ən çox müzakirə olunan tərəf isə qiymətdir: illik təhsil haqqı 55 min dollardır; hazırlıq qrupundan səkkizinci sinfə qədər oxuyan uşaq üçün bu, təxminən yarım milyon dollar təşkil edə bilər.