Canva "Code 2.0"ı təqdim etdi

Canva "Code 2.0"ı təqdim etdi: Pulsuz hesablar da daxil olmaqla hər bir istifadəçiyə süni intellektlə sayt yaratmaq imkanı verilir

Canva istifadəçilər üçün yeni süni intellekt funksiyası – "Canva Code 2.0" alətini təqdim edib. Bu funksiya sayəsində sadə mətn təsvirlərini interaktiv veb-saytlara və tətbiq prototiplərinə çevirmək mümkün olacaq. Yenilik həm ödənişli, həm də pulsuz hesablar üçün istifadəyə verilib. Şirkətin aylıq 265 milyondan çox istifadəçisi bu imkandan yararlana biləcək.

Bu gün bu sahə artıq milyard dollarlıq startapların yaranmasına səbəb olub və proqramçı olmayan insanların proqram hazırlamasına baxışını kökündən dəyişib.

Lovable, Replit və Bolt.new kimi platformalar əsasən istifadəçilərin verdiyi mətn təlimatlarını işlək koda çevirməyə fokuslanır. Canva isə fərqli yanaşma seçir: şirkətə görə əsas məsələ kodun yazılması deyil, ortaya çıxan məhsulun vizual baxımdan cəlbedici görünməsidir. Məhz buna görə Canva Code 2.0 yaradılan nəticəni platformanın vizual redaktoru vasitəsilə asanlıqla redaktə etməyə və fərdiləşdirməyə imkan verir.

Canva-nın AI məhsulları üzrə rəhbəri Denni Vunun sözlərinə görə, Canva Code proqramçılar üçün deyil, texniki biliyi olmayan istifadəçilər üçün hazırlanıb. Məqsəd istifadəçilərin dizayn mühitindən ayrılmadan interaktiv veb-saytlar, təqdimatlar və digər rəqəmsal layihələr yaratmasını daha əlçatan etməkdir.