BYD insanabənzər robotları satış salonlarına gətirir

Çin avtomobil bazarının lideri BYD yeni insanabənzər robot modeli Xiao Di-ni avtosalonlarına gətirir. İlk təqdimat Zhengzhou şəhərində keçirilib, robotlar yaxın zamanda Shenzhen və Şanxaydakı Di Space şourumlarında da müştərilərlə görüşəcək. 1.61 metr boyunda və 58 kiloqramlıq robot altı Çin dialekti və altı xarici dil bilir, üz tanıma və jest oxuma qabiliyyətinə malikdir. Şirkət satışların ardıcıl azalması fonunda bu addımla müştərilərin marağını artırmağı hədəfləyir. Salondakı robotlar ziyarətçiləri qarşılayacaq, avtomobillər haqqında məlumat verəcək və sualları cavablandıracaqlar. Hər salonda 2-3 robotun işləməsi planlaşdırılır və bir-iki il ərzində BYD-nin bütün satış məkanlarında bu robotlar fəaliyyət göstərəcək.