AGEC və Masdar Qaradağ GES və Naxçıvan layihələrini araşdıracaq

Azərbaycanın yaşıl enerji gündəliyi yeni əməkdaşlıqla genişlənir:
AGEC və Masdar birgə layihə imkanlarını araşdıracaq.
İki şirkət bununla bağlı əməkdaşlıq sazişi imzalayıb.

Saziş Azərbaycan Respublikası Prezidentinin BƏƏ-nin milli təhlükəsizlik müşaviri və Əbu-Dabi Əmirliyinin hakiminin müavini ilə görüşü çərçivəsində bağlanıb.
Razılaşmaya əsasən, Qaradağ Günəş Fotoelektrik Stansiyası layihəsinin gücü 230 MVt-dən 350 MVt-dək artırıla bilər.

Həmçinin layihəyə 200 MVt·saata qədər tutuma malik batareya tipli enerji saxlanc sisteminin əlavə edilməsi nəzərdə tutulur.
Naxçıvan Muxtar Respublikasında isə 100 MVt gücündə fasiləsiz bərpaolunan enerji layihəsi nəzərdən keçirilir.
Bu layihə “Masdar” şirkətinin bərpaolunan enerji istehsalını batareya saxlanc sistemləri ilə birləşdirmək təcrübəsinə əsaslanacaq.
Əsas məqsəd etibarlı, çevik və idarəolunan təmiz enerji təchizatına nail olmaqdır.